Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

AMK - nın Həmkarlar İttifaqı Komitəsinin təşkilatçılığı ilə əməkdaşlar üçün Ekskursiya

26 iyul, 2026-cı ildə Azərbaycan Milli Konservatoriyası Həmkarlar İtiifaqı Komitəsinin təşkilatçılığı ilə əməkdaşların asudə vaxtlarının səmərəli təşkili məqsədi ilə növbəti səfər - Quba rayonuna bir günlük gəzinti təşkil edilmişdir. Bu ekskursiyada AMK-nın texniki-təsərrüfat şöbəsinin əməkdaşları iştirak edib. Kollektiv ruhun möhkəmlənməsinə yönəlik belə silsilə səfərlər komitənin əsas fəaliyyət istiqamətlərindədir.

AMK - nın Həmkarlar İttifaqı Komitəsinin təşkilatçılığı ilə əməkdaşlar üçün Ekskursiya

12 iyul, 2026-cı ildə Azərbaycan Milli Konservatoriyası Həmkarlar İttifaqı Komitəsinin təşkilatçılığı ilə əməkdaşların asudə vaxtlarının səmərəli təşkili məqsədilə Bakı ətrafı ekskursiya təşkil olunub. Yanardağ, Atəşgah məbədinə səfər yüksək təssüratlarla yadda qalıb.

Yubiley təbrikləri

7 iyul 2026-cı il tarixində Azərbaycan Milli Konservatoriyasında 2025/2026-cı tədris ilinin yekun Elmi Şura iclasında AMK-nın "Milli vokal" kafedrasının müəllimi, Əməkdar artist Əliəhməd İbrahimov, “Populyar musiqi və caz ifaçılığı” kafedrasının müəllimi, Azərbaycan Respublikasının Əməkdar incəsənət xadimi Vaqif Gərayzadə, "Fortepiano" kafedrasının müdiri, Əməkdar müəllim Naibə Şahməmmədova, "Milli vokal" kafedrasının müəllimi, Əməkdar artist Zenfira İsmayılova, həmçinin AMK-nın mətbuat katibi, yazıçı-publisist Aysel Fikrət yubileyləri münasibətilə fəxri fərmanlarla təltif olunublar.

Fəxri fərmanları yubilyarlara Azərbaycan Milli Konservatoriyasının rektoru, sənətşünaslıq doktoru, professor, Kamilə Dadaş-zadə təqdim edib.

Təqdimetmə zamanı Rektor yubilyar əməkdaşların Azərbaycan Milli Konservatoriyasının elmi-pedaqoji, yaradıcılıq və ictimai fəaliyyətindəki xidmətlərini qeyd edib, onlara möhkəm cansağlığı, yeni nailiyyətlər və gələcək fəaliyyətlərində uğurlar arzulayıb.

Azərbaycan Milli Konservatoriyasının kollektivinin Siyəzən səfəri

15 iyun 2026-cı ildə Azərbaycan Milli Konservatoriyası Həmkarlar İttifaqı Komitəsinin təşkilatçılığı ilə Konservatosiyanın bir qrup əməkdaşları üçün Siyəzən rayonuna gəzinti təşkil edilmişdir. Müəllimlərin asudə vaxtlarının səmərəli təşkili və kollektiv ruhun möhkəmlənməsinə yönəlik belə silsilə səfərlər komitənin əsas fəaliyyət istiqamətlərindəndir.